Подготовка текста и комментарии Е. К. Ромодановской
СЛОВО О СУДЬБАХЪ БОЖИИХЪ, ЯКО НЕБО И ЗЕМЛЯ МИМО ИДЕТЪ,
А СЛОВЕСА МОЯ НЕ ИМУТЪ ПРЕИТТИ
Бысть царь неки, славенъ и богатъ зело, кипяше богатствомъ многимъ. Едина ему печаль бяше: детей не бысть у него. И о том всегда моляся Богу с супругою своею, дабы имъ поведалъ плод чрева. И услыша милосерды Богъ молитву ихъ, пода имъ плод — дщерь родися. И сотвори царь пиръ велий о рожестве ея, и созва вси людие, иже во области его. И призва волхвы и звездоблюстители, и рече имъ: «Зрите и узнавайте деву сию, что и какова будетъ». — Они же царю: «Господине, не смеемъ глаголати». — Царь рече: «Глаголите без боязни». — Они же глаголя: «Девица сия будетъ благочестива и премудра, и всякаго разума исполнена, токмо едино зло: будетъ сия дева во своемъ возрасте обещещена, биена будетъ бичом по нагому телу». — Царь же, сие слышавъ, бысть в великой печали. И отидоша.
И растя же девица, и цветуще лепотою своею велми прекрасно, и разумом и премудростию всехъ превзыде, и научися грамоте и всякой премудрости. И бысть девица в возрасте, отецъ же ея устрой столпъ мраморенъ и позлати златом, и украси в немъ всяким узорочиемъ столы и седалища и подножия, все златомъ и камением украси. И введе ту девицу, и пристави к ней служити благозрачныя девы. Она же живяще, веселящеся.
И единою нача вопрошати девицъ: «Что ради отецъ мой тако ми устрой?» — Едина же дева тайно ей сказа все по ряду, како о ней про разумъ прорековали. Она же о том нача вельми сетовати и тужити, понеже зелен виноград не сладокъ, а млад умъ не крепокъ. Лутчи бы возложити на Бога, нежели свое умышляти, понеже великим и славным людемъ паче греха бесчестие. Сие же умысли девица во уме своемъ: «Лутче мне умрети, нежели обезчещеной быти» — а не помысли судбы Божия бездна.
И повеле царевна под столпъ бочку полну зелия1 подкатити и свещу прилепити. И взорва столпъ к воздуху со всемъ зданием, и бысть все в прахъ.
Едину же деву, дщерь цареву, маниемъ Божиимъ и несе по воздуху во иное царство и постави в царствующемъ граде среди людей на купилище2. Людие же того города нача мнози сходитися и обступиша окрестъ. Дева же обзирашеся семо и овамо3, стояще во всемъ царскомъ своемъ платье.
И промчеся чюдо сие до царя. Он же повеле девицу вести пред себя. И видя девицу украшену и благочинну взором и ступаниемъ, удивися и нача вопрошати, коево царства и какова рода. Она же токмо очима зряше, а ничего глаголаше и по семь, языка ихъ не знаяше.
Бысть же у того царя философъ старъ, живъ много летъ и не моги ходити ногама. И учини ему царь златы коверъ, онъ же на нем почиваше. И повеле царь принести того философа и рече: «Что сие, философе?» — Философъ же рече: «Царю, во веки живи! Видиши ли, сие дело от судебъ Божихъ. Повели девицу языку учити своему». — И быть тако.
И в мале времени научися девица языку и грамоте ихъ, и нача царю поведати страну свою и отца своего, и вся по ряду. И от того времени царь девицу имея в великой чести, и причте ея ко своим дщеремъ.
Обычай же в том царстве таков: полагати на царя на новое лето новый венецъ на главу цареву, сотворенъ от драгаго бисера, и полагаше в нем три драгие камени на славу Пресвятей Троице. И какъ приходитъ новое лето, повеле царь девице делати той венецъ и вда же ей три камени честные и драгие.
Царевна же вземъ, отиде в сокровенную камару и нача делу прилежати, бе бо хитра зело. И постави три камени на оконце на златом блюде. И Божими судьбами прилете вранъ, вземъ единъ камень и улете. Девица, сие увидевъ, нача сетовати и плакати, и поведа царю. Царь же нача деву вопрошати: «Где еси дела камень?» — И кляся она, плакате, что унесе птичищь.
Царь же возьярися на девицу: «Окаянница, еще еси юна, а старым лжеши! Украла еси камень! Несть другаго таковаго в царской ризнице!» — И повеле девицу обнажити и кнутом пытати. Девица же токмо слезами обливашеся и помянувъ свое первое согрешение, како хотяше судеб Божихъ избыти.
Царь же недоумевашеся, что сотворити. И повеле принести старого философа на златом ковре. Принесену же ему бывшу4, рече царь философу: «Что учиню девице? Украде у меня драги камень». — Философ глаголя: «Во веки живи! Аще сие дело от диявола — остави: само скоро обличится и в тление разорится; аще ли от Бога, то ни ты, ни инъ кто можетъ раззорити — остави: само собою объявится. Ими же весть Богъ, судбами». — И послуша его царь, повеле девице пребывати в свободе.
седяше, и дщери царевы. И мановениемъ Божимъ прилете вранъ оконцемъ и принесе той камень, положи его на стол на златое блюдо, всемъ ту зрящимъ5, сам же излете вонъ.
Царица же и дева и сущий с нею вземъ камень, дивишася и несе ко царю. И уведе царь, яко несть неправды в девице, и нача ее наиболе чтити.
Девица же вся царю о себе исповеда, чия дочи и за что пострада. И помысли царь отпустити девицу ко отцу ея. И учреди корету, оковав златом, и опоны окрестъ украси камением и чистымъ жемчюгомъ. И посла со девицею посла своего, честна мужа, и иные вельможи, и жены, и отроковицы ко царю, ко отцу ея.
«А посла к тебе братъ твой, царь нашъ, такия дары, яко несть у тебе таковых во всемъ царстве твоемъ».
И повеле царь устроити полату, и вниде сам и со царицею в полату, повеле послу быти з дарами. Посол же идяше и вси вельможи пред коретою откровенными главами, благочество вниде с коретою в полату. И поклонився царю по подобию царскому, и правя от царя своего послование все по ряду.
И рече царь: «Яви ми, после, дары, якоже ты похвалился еси, что у нас таковыхъ несть во всемъ царствии нашемъ». — Посол же рече: «Воистинну, царю, не солга». — И тако откры запану кореты златую, и выйде ис кореты дыцерь царева. И рече посол: «О царю, познавай честьные дары, еже есть детище». — Царь же и царица позна свою дщерь, охапився6, паде на выю ея, облобыза ея, плачеся от радости. И бысть радость велия во всемъ царстве, не токмо царь, но и всии людие прославиша Бога, творящаго дивная чудеса, яко мертва бе и оживе, погибла бе и обретеся. Царь же одаривъ посла много, отпусти восвояси.
Богу нашему слава. Аминь.
1 пороха;
2 торговая площадь, рынок.
3 сюда и туда;
4 когда же его принесли;
6 обнявшись.
Комментарии
СЛОВО О СУДЬБАХ БОЖИИХ
«Слово о судьбах Божиих, яко небо и земля мимо идет, а словеса моя не имут прейти» сохранилось в единственном списке первой трети XVIII в. Оно относится к беллетристическим повестям о «проверке Писания», широко распространенным в литературе XVII в., что подчеркнуто вынесенной в заглавие цитатой из Евангелия. Для повести характерно оригинальное сочетание фольклорных и книжных традиций: исконная правота евангельского текста доказывается разработкой чисто сказочного сюжета, напоминающего сюжет «спящей царевны» (предсказание грядущих бедствий при рождении ребенка, безуспешные попытки родителей избежать их, волшебное исполнение предсказанного). Чисто сказочный мотив ворона, крадущего, а затем возвращающего драгоценный камень, соседствует с книжными элементами, созданными под влиянием официального законодательства (мотив «бесчестия» и наказания «бичом по нагому телу») и реалий нового времени (бочка с порохом — «зелием»). Индивидуальным авторским творчеством можно объяснить эпизоды с философом «на златом ковре» и торжественное описание посольства, везущего царскую дочь.
«Царевнина Талань» (талань — судьба), см.: Сравнительный указатель сюжетов. Восточнославянская сказка. Л., 1979 (736В*).
Повесть публикуется по списку ГИМ, —17, ранее издававшемуся: Ромодановская Е. К. Неизвестная повесть-сказка в рукописном сборнике XVIII века // Древнерусская рукописная книга и ее бытование в Сибири. Новосибирск, 1982. С. 234—241.
Стр. 412. ... небо и земля... не имут преитти. — Ср.: Мф. 24, 35; Мр. 13, 31.