ЛЕГЕНДА О ГРАДЕ КИТЕЖЕ
КНИГА ГЛАГОЛЕМАЯ ЛеТОПИСЕЦ, ПИСАНА В ЛеТО 6646 СЕНТЯБРЯ В 5 ДЕНЬ
Бе сей святый благоверный и великий князь Георгий Всеволодович[1] сын святому благоверному и великому князю Всеволоду, а во святом крещении наречен бысть Гавриил, псковский чудотворец.[2] Сей святый благоверный и великий князь Всеволод сын бе великому князю Мстиславу,[3] внук же святому и равно апостолом великому князю Владимиру Киевскому,[4] самодержьцу Российския земли. Святый же благоверный и великий князь Георгий Всеволодович — правнук же святому благоверному и великому князю Владимиру.
Святый же благоверный княз Всеволод первие княжи в Великом Нове-граде. Егда же бысть время, возропташа новгородцы на нь и реша сами собою промежь себе, яко князь наш, не крещен сый, владеет нами крещеными. Совет же сотвориша, и приидоша к нему, и изгнаша вон. Он же прииде в Киев к дяде своему Ярополку[5] и сказа ему все, за что изгнан бысть новогородцы. Он же, слышав от него, и въда ему Вышград. И ту молим бысть от псковичь княжити у них, и прииде к ним во град Псков. И по времени восприя благодать святаго крещения, и наречен бысть во святом крещении Гавриил. И пребысть в велком пощении и воздержании, и пребысть лето едино в вечный покой отиде, в лета 6671-го, месяца февраля в 11 день. И погребен бысть сыном его благоверным и великим князем Георгием. И быша чудеса многа от святых мощей его в славу и хвалу Христу Богу нашему и всем святым. Аминь.
Сей святый благоверный князь Георгий Всеволодович по преставлении отца своего благоверного князя Всеволода, нареченного во святом крещении Гавриила, пребысть на месте его по умолении псковичь. Бысть же сие в лета 6671. Изволи святый благоверный и великий князь Георгий Всеволодовичь ехать к благоверному князю Михаилу Черниговскому.[6] Егда же прииде к благоверному князю Михаилу и благоверный и великий князь Георгий, и поклонися благоверному князю Михаилу, и рече ему: «Здрав буди, благоверный и великий княже Михаиле, на многая лета, сияя благочестием и верою Христовою, во всем уподобися прадедом нашим и прабабе нашей, благоверной великой княгине, христолюбивой Олге,[7] иже обрете себе избранного и честного: бисера Христа, и веру его святых пророк же и апостол, и святых отец, и благоверному христолюбивому царю и равноапостольному прадеду нашему, царю Константину».[8] И рече ему благоверный князь Михаил: «Здрав же буди и ты, благоверный и великий княже Георгий Всеволодовичь, прииде ко мне з благим советом и независтным оком. Что бо приобрете от зависти дед наших Святополк, иже восхоте владети и уби братей своих благоверных и великих князей. Бориса повеле копием пробости, Глеба же ножем заклати[9] в лета княжения их. Обольсти бо их лестию и советом сатаниным, яко мати при смерти есть наша.[10] Они же, яко незлобивые агньцы, уподобишася благому пастырю своему Христу, не сопротив сташа врагу своему брату. Господь же прослави святыя угодники своя, благоверных князей и великих чудотворец Бориса и Глеба».
И даша целование промеж себе сами, и праздноваша духовно и веселивъшеся, и рече благоверный и великий князь Георгий благоверному князю Михаилу: «Даждь ми грамоту в Русии нашей по градом церкви Божия строити и грады». И рече ему благоверный и великий князь Михаил: «Якоже хощеши, тако и сотвори церкви Божия в славу и хвалу пресвятому имени Божию. За сие доброе твое изволение мзду приимеши в день пришествия Христова».
И пироваше много дний. И егда изволи благоверный князь Георгий ехати во свое место, тогда благоверный князь Михаил повеле грамоту написати и свою руку приложи к грамоте. И егда благоверный князь Георгий поеха во свое отечество и град, тода благоверный князь Михаил с великою честию отпущяше его и провожаше. И егда бысть оба князи на пути, и поклонистася друг другу на пути, и вда ему благоверный князь Михаил грамоту. Благоверный же князь Георгий взя грамоту у благовернаго князя Михаила, и поклонися ему, тогда и той противу ему.
И поеха по градом, и егда приеха в Нов-град, повеле строити церьковь во имя Успения пресвятыя владычицы нашей Богородицы и приснодевы Марии в лето 6672. Из Нова-града поехав во Псков, град свой, идеже преставися отец его, благоверный князь Всеволод, а во святом крещении Гавриил, новогородский и псковский чудотворец. И поеха изо Пскова града к Москве, и повеле строити церковь во имя Успения пресвятыя владычицы нашея Богородицы и приснодевы Марии в лето 6672. И поеха с Москвы в Переславль Залеской, а с Переславля града в Ростов град. В то же время бысть в Ростове граде великий князь Андрей Боголюбский.[11] И повеле благоверный князь Георгий во граде том Ростове церковь строити во имя Успения пресвятыя владычицы нашея Богородицы и присно девы Марии в лето 6672, месяца маия, в 23 день. Во дни великого князя Георгия начаша рвы копати на основание церкви, обретоша же мощи лежаще святителя Христова Леонтия епископа ростовского, чюдотворца,[12] иже обрати в Ростове граде люди в веру христову и крести их от мала и до велика. И возрадовашеся радостию великою благоверный князь Георгий и прослави Бога, давшаго ему таковое многоценное сокровище, и отпе молебен. И повеле ехати Андрею, князю Боголюбскому, во град Муром и строити во граде Муроме церковь во имя Успения пресвятыя владычицы нашея Богородицы и присно девы Марии.
Сам же благоверный и великий князь поеха из града Ростова, и приеха во град Ярославль, что на брегу Волги реки стоит. И седе в струг, и поеха на низ по Волге, и приста к брегу в Малый Китежь, что на брегу Волги стоит, и построи его. И начаша его молити вси людие града того благовернаго князя Георгия, чтобы образ чудотворный иконы пресвятыя Богородицы Феодоровския внес во град к ним. Он же по прошению исполни. Начат пети молебен пресвятей Богородице. Егда сконча, восхоте образ той нести во град, образ же не пойде с места того, нимало не поступи. Видев же благоверный князь Георгий изволение пресвятыя Богородицы, где сама изволила место себе, повеле построити на том месте монастырь во имя пресвятыя Богородицы Феодоровския.
Сам же благоверный князь Георгий поеха с места того сухим путем, а не по воде. И перееха реку Узолу, и вторую реку перееха именем Санду, и третию реку перееха именем Саногту, и четвертую перееха именем Керженец, и приеха к езеру именем Светлояру. И виде место то велми прекрасно и многолюдно. И по умолению их повеле благоверный князь Георгий Всеволодович строити на брегу езера того Светлояра град именем Болший Китеж, бе бо место то велми прекрасно, и на другом же брезе езера того роща дубовая.
Советом же и велением благоверного и великаго князя Георгия Всеволодовича начаша рвы копати на утверждение места. И начаша класти церковь во имя Воздвижения честнаго креста Господня, вторую же церковь — во имя Успения пресвятыя владычицы нашея Богородицы и присно девы Марии и третию церковь — во имя Благовещения пресвятыя владычицы нашея Богородицы и присно девы Марии. В тех же церквах повеле пределы делати иных праздником Господьскым и Богородичным. Тако же и образы всем святым написати повеле.
И град той Больший Китежь на сто сажен в длину и в ширину, и бысть первая мера мало место. Повеле же благоверный князь Георгий еще на другое сто сажен прибавити в длину, и бысть мера граду тому в длину — два ста сажен, а в ширину — на сто сажен. И начаша же град той каменный строити в лето 6673, месяца маия в 1 день, на память святаго пророка Иеремия и иже с ним. И строитца град той три лета, и построиша его в лето 6676, месяца сентября в 30 день, на память святаго священномученика Григория Великия Армении.
И иже поехаша в Малый Китежь, что на брегу Волги стоит, благоверный князь Георгий Всеволодович. И по строении градов тех, Малаго и Большаго, повеле перемеряти поприща,[13] коль много межь собою расстояния имеют. И повелением благовернаго князя Георгия намеряша сто поприщь. Благоверный же князь Георгий Всеволодовичь, слышав сия, воздаде славу Богу и пресвятей Богородице, повеле же и летописец книгу написати. Сам же благоверный и великий князь Георгий Всеволодовичь повеле всю службу отслужити. И молебен пропев пресвятей Богородице Феодоровской, и по совершении службы тоя поеха, всед в струг свой, и отплы в путь свой в прежде реченный свой Псков град. Людие проводиша его с великою честию, и целоваша его, отпустиша.
По построении же градов тех поживе лет 75.
Быст в лето 6747. Попущением Божиим грех ради наших прииде на Русь воевати нечестивый и безбожный царь Батый. И разоряше грады и огнем пожигаше, церкви Божия такоже разоряше и огнем пожигаше же. Людей же мечю предаваше, а младых детей ножем закалаше, младых дев блудом оскверняше. И бысть плач велий.
Благоверный же князь Георгий Всеволодовичь, сия слышав, плакаше горко. И помолився ко Господу и пресвятей Божией Матери, собра вои своя, поиде противу нечестиваго царя Батыя с вои своими. И егда сразишася вои обои вкупе, бысть сеча велия и кровопролитие.
Тогда у благовернаго князя Георгия и бысть мало вой, побеже благоверный князь Георгий от нечестиваго царя Батыя вниз по Волге в Малый Китеж. И много брася благоверный князь Георгий с нечестивым царем Батыем, не пущая его во град свой.
Егда же бысть нощь, тогда благоверный князь Георгий изыде тайно из града того въ Больший град Китеж. На утрие же воста той нечестивый царь на град той с вои своими, приступом приступи и взя его. И всех поби и прируби людей во граде том. И не обрете благовернаго князя во граде том, нача мучити человека, и немогий мук терпети поведа ему путь. Той же нечестивый гнаше вслед его. И егда прииде ко граду тому, нападе на град той со множеством своих, и взя той град Больший Китеж, что на брегу езера Светлояра, и уби благовернаго князя Герогия месяца февраля в 4 день. И поеха из града того нечестивый той царь Батый. И после его взяша мощи благовернаго князя Георгия Всеволодовича.
И не видим будет Болший Китежь даже и до пришествия Христова, яко же и в прежняя времена бысть сия, яко же свидетельствуют жития святых отец, патерик Монасийский, и патерик Скитский, и патерик Азбучный, и патерик Иеросалимский, и патерик Святыя Горы,[14] яко сия святые книги согласны, в них писаны жития святых отец, и сокровенныя обители не едина, но много монастырей, и въ тех монастырех много множество бысть святых отец, яко звезд небесных просияв житием своим. Яко песка морскаго невозможно исчести, тако и сих невозможно писанию предати и вся списати. О них же, провидя Духом Святым, блаженный и пророк Давыд царь, удивляясь, вопиет Духом Святым, в богодухновенной книге своей Псалтыри глаголет: «Праведник яко финик процветет и яко кедр иже в Ливане умножится, насаждени в дому Господни во дворех Бога нашего процветут».[15] И еще той же пророк царь Давыд: «Мне же зело честнии быша друзи твои, Боже, зело утвердишася владычествия их, изочту их, и паче песка умножатся».[16] О сих, провидя Духом Святым, блаженный апостол Павел в послании книги своея глаголет, провидя, сие слово к нам глаголет: «Проидохом во овчинах и козиях кожах, лишени, скорбящеи, озлоблени, имже не бе достоин мир».[17] То же слово и святый Иоанн Златоуст рече, в поучении своем глаголет в неделю 3-ю поста. То же слово, провидя, к нам святый Анастасий горы Синайския[18] глаголет. Сие же слово апостольское, провидя, нам глаголет и преподобный отец наш Иларион Великий,[19] о святых пишет: «И такоже убо в последнее время будет сие: грады и монастыри сокровеныя будут, якоже антихрист царствовати начнет в мире. Тогда побегут в горы и в вертепы, и в пропасти земныя». Человеколюбивый же Бог не оставит тогда хотящаго спастися. От усердия, и умиления, и слез все человеку Бог строит. Самого Спасителя Божественная уста глаголаше в пресвятом Евангелии, рече, яко вся ищущему и хотящему спастися дастъся.[20]
И по убиению святаго и благовернаго и великаго князя Георгия Всеволодовича и по погребению честных мощей его, в лето 6-е прииде той царь Батый воевати в русское царство. Пойде же противу Батыя царя благоверный князь Михаил Черниговский з боярином своим Феодором. И егда сразишася вои обои вкупе, и бысть кровопролитие велие. И уби той нечестивый царь Батый благовернаго и великаго князя Михаила Черниговскаго з болярином Феодором в лето 6750, месяца сентября в 20 день. И после убиения благовернаго князя Михаила Черниговскаго во 2-е лето[21] уби благовернаго князя Меркурия Смоленскаго[22] той нечестивый царь Батый в лета 6755, месяца ноября в 24 день. И бысть запустение московскаго царства и прочих монастырей и того града Большаго Китежа в лето 6756.
Повесть и взыскание о граде сокровенном Китеже. Аще ли же который человек обещается истинно итти в него, а не ложно и от усердия своего поститися начнет, и многи слезы пролиет, и пойдет в него, и обещается тако, аще и гладом умрети, а из него не изыти, аще ины многи скорби претерпети, еще и смертию умрети, веждь, яко спасет Бог таковаго, яко стопы его вся изочтены и записаны будут аггелом. Яко на путь спасения поиде, яко же свидетельствуют о сем книги, патерик Скитский. Бысть некоторый отец, обрати некую блудницу от блуда. Блудница же поиде с ним в монастырь. И прииде пред враты монастыря того и умре. И бысть спасена. И вторая такоже изыде в пустыню со отцем и умре. И прияша ангели душу ея и возведоша по лестнице на небо.
Тако и той человек. Аще случитъся и умрети, по Божественному писанию рассудится. Бежа бо той подобен сему духовно бежа от блудницы вавилонския темныя и скверныя мира сего, яко же святый Иоанн Богослов во Откровении, книги своея, написа. О последнем времени глаголет, яко жена седя на звери седмиглавном нага и безстудна, в руках же своих держит чашу, плъну всякия скверны, и смрада исполънена, и подает в мире сущим, любящим сея, первие патриархом, царем, и князем, и воеводам, и всяким властем богатым, и всяким людем в мире сем суетнем, любящим сласти сея.
жити смиренъным и духовным путем. Той же проклятый змий учит широким и пространным путем ходити и стезею злобы, и запинает, и возбраняет с праваго пути, и совращает, и велит жити растленным житием, и возъбраняет по правому пути ходящим.
А иже хощет, и ищет, и желает спасения, того человека и наипаче вразумляет и помогает ему благодать Божия, и учит, и ведет его на совершенное духовное смиренное житие. Никто же бо никогда нигде оставлен бысть от Господа. Призвах когда, услышан бысть от него. Или когда просит, и не приемлет ли? И ищет, и не обрящет ли от него? Вся убо Господь приемлет к нему приходящие с радостию и призывает. Но яко же убо силы на небесех не видят лице Божие. А егда грешник на земли покается, тогда ясно зрят лице Христово силы вся небесныя, и открывается слава Божества его, и видят лице его. Единыя убо души грешныя кающияся радость бывает на небесех всем силам небесным, и всем святым его.[23] А силы убо — ангелы и архаггелы, херувимы и серафимы, начала, и власти, и господьствия. И святыя убо сия суть: пророки, и апостолы, и святители, и преподобныя, и праведныя, мученики, и мученицы, и вси святии. Единого грешнаго ради покаяния бывает радость всем силам небесным и всем святым его.
несуменною обещается, и помышляти ничто же суетно в себе, или возвратится въспять, не поведа ни отцу, ни матери, и сестрам, и братиям и таковому Господь открывает и управит его в таковое благоутишное пристанище молитвами преподобныхъ отец наших онех, иже трудятся день и нощь непрестанно. От уст их молитва, яко кадило благоуханно. Молят же ся и о хотящих спастися истинным сердцем, а не ложнымъ обещанием. И хотящим спастися и молитися, который человек обратитися к ним и аще кто откуду обратился, таковаго приемлет с радостию, яко от Бога наставляема.
И хотящему итъти в таковое место святое никакова помысла не имети лукава, и развращенна, и мятущего ум, и отводящаго в места оного мысли человека того хотящаго итти. Но убо велми блюдися опасно мыслей злых, хотящих разлучити от места того. И не помышляти семо и овамо. Таковаго управит человека Гсподь на путь спасения. Или извещение приидет ему из града того иже или из монастыря того, иже сокровени бяху оба, град же и монастырь. Есть бо и летописец книга о монастыре том. На первое слово возвращуся.
Аще ли же пойдет и мыслити начнет, славити везде, и таковому закрыет Господь. И покажется ему лесом и пустым местом. И ничто же таковый получит себе, но токмо труд его всуе бысть. И соблазн, и укор и понос ему будет за сие от Бога. Казнь приимет зде и будущий век, осуждение и тьму кромешную, иже таковому святому месту поругася иже на конец века сего чудо явися: невидим град бысть, якоже и в прежняя времена бысть много монастырей, не видимы быша, иже писаны в житиях святых отец, пространнее узриши.
достойне и праведне тому припадающих, иже не узрит скорби и печали от зверя антихриста. Токмо о нас печалуют день и нощь, о отступлении нашем, всего государьства московского, яко антихрист царьствует в нем и вся заповеди его скверная и нечистыя.
Запустение града того поведают отцы, слышавши от прежде бывших их отец по разорении градском и по сте летех после нечестиваго и безбожнаго царя Батыя. Разори бо всю ту землю заузольскую и села и деревни огнем пожже. И лесом поросте вся та страна заузольская. И с того времени не видим бысть град той и монастырь.
Сию убо мы книгу летописец написали в лета 6759 и уложили собором и предали святей Божией церкви на утвержение всем православным христианом, хотящим прочитати или слушати, а не поругатися сему божественному писанию. Аще ли же который человек поругается или посмеется нами преданному сему писанию, да весть таковый: той не нам поругается, но Богу и пречистей его матери, владычице нашей Богородице и присно деве Марии. В нем же славится и величается и именуется великое имя ея, матери Божии, тех же и она соблюдает, и хранит, и покрывает дланию своею, и молитву за них к сыну своему глаголющи: «Не презри моего, сыне любезный, прошения. Иже кровь свою излия на весь мир, темже и сих помилуй, и сохрани, и соблюди призывающих имя мое с верою несумненною и чистым сердцем». Темже Господь покры их своею рукою, иже мы написали, и уложили, и предали.
И к сему нашему уложению ни прибавити, ни убавити, ниже всяко пременити ни едину точку или запятую. Аще ли кто прибавит, или всяко пременит, да будет по святых отец преданию проклят, иже предавших сия и утвердивших. Аще ли кому неверно мнится, то прочти прежде бывших святых жития, и увесть, яко бысть много в прежняя времена сего. Слава иже в Троицы славимому Богу и пречистей его Богоматере, соблюдающей и хранящей место оно, и всем святым. Аминь.
[1] ... великий князь Георгий Всеволодович...— великий князь владимирский (ок. 1187—1238), сын великого князя Всеволода Юрьевича Большое Гнездо, внук Юрия Долгорукого.
— Всеволод-Гавриил Мстиславич, князь новгородский с 1117 г., в 1136 г. был изгнан новгородцами. В 1137 г. был приглашен во Псков на княжение, умер в 1137 или 1138 г.
[3] ... великому князю Мстиславу...— великий князь киевский (1076—1132), старший сын Владимира Мономаха.
[4] ... равно апостолом великому князю Владимиру Киевскому...— Владимир I Святославич, великий князь киевский, при котором произошло крещение Руси, поэтому он и назван «равным апостолам».
[5] ... прииде в Киев к дяде своему Ярополку...— Ярополк II Владимирович (1082—1139), сын Владимира Мономаха, великий князь киевский (1132—1139 гг.), был дядей Всеволоду-Гавриилу Новгородскому.
[6] ... князю Михаилу Черниговскому.— Князь Михаил Всеволодович Черниговский был шурином князя Георгия Всеволодовича.
— жена князя Игоря Рюриковича (ум. в 969 г.), бабка Владимира I Святославича; после смерти Игоря (945) управляла Киевской землей. Еще до крещения Руси князем Владимиром приняла крещение.
[8] ... прадеду нашему, царю Константину.— Имеется в виду римско-византийский император Константин Великий (ок. 285—337 гг.), сделавший христианство официальной государственной религией.
[9] ... Святополк, иже восхоте владети и уби братей своих благоверных и великих князей. Бориса повеле копием пробости, Глеба же ножем заклати...— Князья Борис и Глеб, сыновья киевского князя Владимира Святославича, были убиты по приказу своего брата Святополка Окаянного, см. «Сказание о Борисе и Глебе».
[10] ... яко мати при смерти есть наша.— Круг памятников, посвященных Борису и Глебу, говорит о том, что Святополк сообщил братьям о приближающейся смерти их отца, а не матери.
[11] ... великий князь Андрей Боголюбский.— Андрей Юрьевич Боголюбский, великий князь суздальский и владимирский (ок. 1111—1174 гг.), сын Юрия Долгорукого.
— Леонтий, ростовский епископ, обратил в христианство население Ростовской земли, скончался около 1077 г. Обретение мощей св. Леонтия произошло в 1164 г. при великом князе суздальском и владимирском Андрее Боголюбском.
[13] ... повеле перемеряти поприща...— Поприще — древнерусская мера длины, равная приблизительно версте (1066 м).
[14] ... патерик Монасийский, и патерик Скитский, и патерик Азбучный, и патерик Иеросалимский, и патерик Святыя горы...— Патерики — сборники, состоящие или из кратких повестей о подвижниках какого-либо монастыря, или из кратких нравоучительных слов этих подвижников, или из тех и других вместе. Все перечисленные здесь патерики известны, за исключением «Монасийского», возможно это испорченное «Синайский».
[15] «Праведник яко финик процветет... во дворех Бога нашего процветут».— Пс. 91, 13—14.
[16] «Мне же зело честнии быша друзи твои, Боже... изочту их, и паче песка умножатся».— Пс. 138, 17—18.
«Проидохом во овчинах и козиях кожах... имже не бе достоин мир».— Евр. 11, 37—38.
[18] ... святый Анастасий горы Синайския...— Анастасий Синаит — патриарх Антиохийский, христианский писатель VI в.
[19] ... отец наш Иларион Великий...— Илларион Новый, или Пелекитский — христианский автор VIII в.
[20] Самого Спасителя Божественная уста глаголаше... яко вся ищущему и хотящему спастися дастъся.— См. Мф. 7, 7—8; Лк. 11, 9—10.
— Так в рукописи.
— Имеются в виду события, о которых рассказывают «Сказание о Михаиле Черниговском» и «Повесть о Меркурии Смоленском».
[23] Единыя убо души грешныя кающияся радость бывает на небесех всем силам небесным и всем святым его.— Ср. Лк. 15, 7.